Deuteronomy 32

1Bekani indlebe, mazulu, ngizakhuluma, njalo zwana, mhlaba, amazwi omlomo wami ^a. 2Imfundiso yami ^b izathonta njengezulu, inkulumo yami izathonta njengamazolo, njengomkhizo phezu kohlaza ^c, lanjengemifefezo emibhideni ^d. 3Ngoba ngizamemezela ibizo leNkosi. Mnikeni ubukhulu uNkulunkulu wethu ^e. 4UliDwala, umsebenzi wakhe uphelele ^f, ngoba zonke indlela zakhe ziyizahlulelo ^g. UNkulunkulu weqiniso ^h, ongelabubi, ulungile, uqondile ⁱ. 5Bonile kuye, kabasibo abantwana bakhe, isici ngesabo, bayisizukulwana esigobileyo ^j lesiphambeneyo ^k. 6Lingahlawula lokho eNkosini yini, bantu abayizithutha labangahlakaniphanga ^l? Kayisuye yini uyihlo ^m owakuthengayo ⁿ, wakwenza, wakumisa ^o?

7Khumbula insuku zendulo, unakane iminyaka yesizukulwana ngesizukulwana. Buza uyihlo, uzakulandisela, abadala bakho, bazakutshela ^p. 8Lapho oPhezukonke enika izizwe ilifa ^q, lapho esehlukanisa amadodana kaAdamu, wamisa imingcele yezizwe njengenani labantwana bakoIsrayeli ^r. 9Ngoba isabelo seNkosi ngabantu bayo, uJakobe uyinkatho yelifa layo. 10Wamfica elizweni eliyinkangala ^s, lenkangala ^t engelalutho ebhongayo ^u. Wamkhokhela wambhodisa, wamfundisa, wamgcina njengenhlamvu yelihlo lakhe ^v. 11Njengokhozi olunyakazisa isidleke salo ^w, lundiza phezu kwamaphuphu alo, luselula impiko zalo, luwathatha ^x, luwathwale ngezimpaphe zalo ^y, 12iNkosi yodwa yamkhokhela, njalo kwakungekho layo unkulunkulu wabezizwe. 13Yamgadisa endaweni eziphakemeyo zomhlaba, ukuze adle izithelo zensimu ^z. Yamondla ngoluju oluvela edwaleni ^aa, lamafutha ^ab aphuma elitsheni elilukhuni ledwala ^ac, 14izankefu zenkomo, lochago lwembuzi, kanye lamafutha amawundlu, lezinqama zohlobo lweBashani, lezimpongo, kanye lamahwahwa ezinso zengqoloyi ^ad; wena wasunatha igazi lezithelo zesivini, iwayini ^ae.

15Kodwa uJeshuruni wazimuka ^af wakhaba ^ag. Usuzimukile, wakhuluphala, wembeswa ngamahwahwa ^ah. Yena wadela uNkulunkulu ^ai owamenzayo ^aj, wadelela iDwala losindiso lwakhe ^ak. 16Bambangela ubukhwele ngokwezizwe, bamthukuthelisa ngezinengiso ^al. 17Bahlabela amadimoni, hatshi uNkulunkulu, onkulunkulu ababengabazi, abatsha abavela eduze, oyihlo abangabesabanga ^am. 18IDwala elakuzalayo ulikhohliwe, wamkhohlwa uNkulunkulu owakuzalayo ^an. 19Kwathi iNkosi ikubona, yanengwa yibo ^ao, ngenxa yentukuthelo yamadodana ayo lamadodakazi ayo ^ap. 20Yasisithi: Ngizabafihlela ubuso bami, ngibone ukuthi ukuphela kwabo kuzakuba yini ^aq; ngoba bayisizukulwana esiphambeneyo, abantwana okungelakuthembeka kibo ^ar. 21Bona bangenze ngaba lobukhwele ngokungesuye uNkulunkulu ^as; bangithukuthelisile ngezinto zabo eziyize ^at. Ngakho ngizabenza babe lobukhwele ngabangeyisibo abantu; ngibathukuthelise ngesizwe esiyisithutha ^au. 22Ngoba umlilo usubasiwe entukuthelweni yami, uyavutha kuze kube sesihogweni esingaphansi kakhulu ^av; uzaqeda umhlaba lezithelo zawo ^aw, ulumathise izisekelo zezintaba ^ax. 23Ngizabuthelela ububi phezu kwabo, ngiqedele imitshoko yami kubo ^ay. 24Bazamunywa yindlala, baqedwe yikutshisa lencithakalo ebabayo; njalo ngizathumela phakathi kwabo amazinyo ezilo ^az, lobuhlungu bezihuquzelayo zothuli ^ba. 25Ngaphandle inkemba izabenza bafelwe, ngokunjalo uvalo ezindlini ezingaphakathi, ijaha lalo lentombi emsulwa, omunyayo kanye lendoda eyimpunga ^bb. 26Ngathi: Ngizabahlakaza, ngenze ukukhunjulwa kwabo kuphele phakathi kwabantu ^bc; 27uba bengingesabi intukuthelo yesitha, hlezi abazondi babo bahlanekele ^bd, hlezi bathi: Isandla sethu siphakeme; leNkosi kakusiyo eyenze konke lokhu ^be. 28Ngoba bayisizwe esingelakwelulekwa, njalo kakukho ukuqedisisa kubo ^bf. 29Kwangathi ngabe bebehlakaniphile, bebengaqedisisa lokhu ^bg, bazwisise isiphetho sabo ^bh! 30Oyedwa angaxotsha njani abayinkulungwane, lababili babalekise abayizinkulungwane ezilitshumi ^bi, ngaphandle kokuthi iDwala labo libathengisile, leNkosi ibanikele ^bj? 31Ngoba idwala labo kalinjengeDwala lethu ^bk; njengoba izitha zethu zingabahluleli ^bl. 32Ngoba ivini labo livela evinini leSodoma, lemasimini eGomora ^bm; izithelo zabo zesivini ziyizithelo zesivini zenyongo; zilamahlukuzo ababayo ^bn. 33Iwayini labo liyibuhlungu bemigobho ^bo, lobuhlungu obulesihluku ^bp bamabululu ^bq. 34Lokho kakubekiwe kimi yini, kunanyekiwe emagugwini ami ^br? 35Ngeyami impindiselo lokubuyisela, ngesikhathi sokutshelela konyawo lwabo ^bs; ngoba usuku lwengozi yabo selusondele, lezinto abazilungiselweyo ziyaphangisa ^bt. 36Ngoba iNkosi izabahlulela abantu bayo ^bu, izisole ngenceku zayo, lapho ibona ukuthi amandla asehambile ^bv, lokuthi kakho ovalelweyo lokhululekileyo ^bw. 37Khona izakuthi: Bangaphi onkulunkulu babo, idwala ababephephela kulo ^bx, 38abadla amafutha emihlatshelo yabo, banatha iwayini lomnikelo wabo wokuthululwa? Kabavuke, balisize, babe yisivikelo senu. 39Bonani khathesi ukuthi mina, nginguye, njalo kakho unkulunkulu olami ^by; mina ngiyabulala, njalo ngiphilise ^bz; ngiyatshaya, njalo mina ngelaphe; njalo kakho ongahluthuna esandleni sami ^ca. 40Ngoba ngiphakamisela isandla sami emazulwini, ngithi: Ngiyaphila kuze kube phakade ^cb, 41nxa ngilola inkemba yami ephazimayo, lesandla sami sibambelela ekwahluleleni, ngizabuyisela impindiselo ezitheni zami, ngibavuze abangizondayo ^cc. 42Ngizadakisa imitshoko yami ngegazi, lenkemba yami izakudla inyama, ngegazi labagwaziweyo labathunjiweyo ^cd, ekuqaliseni kwezimpindiselo ngimelene lesitha ^ce. 43Thokozani zizwe, bantu bayo ^cf; ngoba izaphindisela igazi lenceku zayo ^cg, ibuyisele impindiselo kuzitha zayo ^ch, yenzele ilizwe layo, abantu bayo, inhlawulo yokuthula ^ci.

44UMozisi wasesiza, wakhuluma wonke amazwi alingoma endlebeni zabantu, yena loHoseya indodana kaNuni. 45UMozisi eseqedile ukukhuluma wonke lamazwi kuIsrayeli wonke, 46wathi kubo: Bekani inhliziyo yenu kuwo wonke amazwi engiwafakaza phakathi kwenu lamuhla, ukuthi libalaye abantwana benu bagcine ukuwenza wonke amazwi alumlayo ^cj. 47Ngoba kakusiyo into eyize kini, ngoba kuyimpilo yenu; ngalinto lizakwelula izinsuku elizweni elichapha iJordani ukuya kulo ukudla ilifa lalo ^ck.

UMozisi uvunyelwa ukuthi abone ilizwe leKhanani

48INkosi yasikhuluma kuMozisi ngalona lolosuku isithi: 49Yenyukela kule intaba yeAbarimi, intaba yeNebo, eselizweni lakoMowabi emaqondana leJeriko, ubone ilizwe leKhanani engilinika abantwana bakoIsrayeli ukuba yilifa ^cl, 50ufele entabeni owenyukela kuyo, ubuthelwe ebantwini bakini ^cm, njengoAroni umnewenu efela entabeni yeHori, wabuthelwa ebantwini bakibo ^cn. 51Ngenxa yokuthi laphambana lami phakathi kwabantwana bakoIsrayeli emanzini eMeriba-Kadeshi enkangala yeZini; ngoba kalingingcwelisanga phakathi kwabantwana bakoIsrayeli ^co. 52Ngoba unganeno uzalibona ilizwe, kodwa kawuyikungena khona, elizweni engilinika abantwana bakoIsrayeli ^cp.